24.
| 1 | Itaque illa tibi non quasi ingrato recensui, sed quasi iure collata numeravi; ut his admonitus, cui plus collatum est, plus diligas. |
| 2 | Denique hoc respondenti Simoni dixit Dominus Iesus: Recte iudicasti (Luc. VII, 44). |
| 3 | Statimque conversus ad mulierem quae pedes eius unguento unxit, typum Ecclesiae gerens, ait Simoni: Propter quod dico tibi: remissa sunt peccata eius multa, quoniam dilexit multum. |
| 4 | Cui autem minus dimittitur, minus diligit (Ibid., 47). |
| 5 | Haec est mulier quae in domum Pharisaei intravit, et eiecit Iudaeum, Christum autem acquisivit. |
| 6 | Ecclesia enim Synagogam exclusit: cur iterum tentatur, ut apud Christi famulum, hoc est, de pectore fidei, de domo Christi Synagoga excludat Ecclesiam? |